belsetan, de Bielsa

Nos presentamos a las eleczions d’el munizipio de Bielsa como una opzión alternatiba a’l poder estableixito, somos una colla de personas con ganas de troballar per el bien de la balle, con ideyas e maneras distintas de fer las cosas, con muta ilusión e, sobre tot, con total transparenzia.

Somos ubiertos a replegar tot tipo de sucherenzias, aportazions, ideyas, etc., que contribuigan a la millora d’este programa pa’s prosimos cuatre años, pa ixo metemos a disposizión d’es bezins la pachina web www.belsetan.com.

Tamién queremos aprofitar la oportunidá de combidar a embrecar-se a este proyeuto a toz aquers que deseyen colaborar-ie.

Contino esponemos es puntos clau d’el nuestro programa eleutoral en es que queremos basar la nuestra chestión munizipal, interpretando el mismo como una declarazión d’intenzions.

01. Plan Cheneral d’Ordenazión Urbana
Consideramos que ye menister la elaborazión e aprobazión d’un PGOU que permita controlar el desarrollo urbanistico. Ye preziso construyir pa poder satisfer la requesta de bibienda, pero puede e debería fer-se de forma proporzionata, razonable e respetando determinatas pautas d’integrazión.
L’autual modelo de creiximiento ye pareixito a’l que han esperimentato altros lugars zercanos en decadas anteriors, güe combertitos en una ripa de bloques d’apartamentos bazíos, apenas ocupatos mientres 15 días a’l año. No repitiamos las mismas errors e autuemos con una gollata a largo plazo.

02. Pistas d’esquí
Mientres cuantas lechislaturas, el proyeuto de construczión de las pistas d’esquí alpino ye estato emplegato como reclamo eleutoral. Un proyeuto insostenible ambientalmén e economicamén s’ha disbrazato de motor de desarrollo local, amagando es berdaders intereses d’es promotors d’el mismo: fer grandismos benefizios economicos obtenitos de la especulazión e la urbanizazión de zientos d’ectarias mesas a disposizión de las entidaz imbersoras.

S’ha charrato muto d’apostar per el turismo d’ibierno pa fagoreixer la desestazionalizazión d’este seutor, pero s’ha feto mui poco pa apañar es problemas d’aczeso ta las pistas d’esquí franzesas u acondizionar las pistas de fondo de Pineta.

03. Transparenzia en la chestión munizipal
La chestión munizipal abría a estar transparén e aczesible pa toz es bezins, tanto residens como es que no’n son. Es que bibimos en “la Balle” tenemos aczeso a las autas d’es plens, pero poco més sabemos de la chestión munizipal. I hai medios bien zerqueta e mui baratos pa lograr ixa transparenzia (prinzipio basico de la democrazia).

04. Depurazión d’auguas residuals
Es nuestros ríos son malmetendo-se de camín, e somos fendo mui poco per impedir-lo. La instalazión de depuraderas en es nuclios urbans aduyaría a aturar esta degradazión, antes que no sía irreparable de tot.

05. Proteczión zibil
Ye preocupán que en una balle tan poblata como la nuestra no i aya un minimo de medios ni personal cualificato en materia de proteczión zibil. Abrinos d’estar prestos pa afrontar emerchenzias, sobre tot cremas en casas: las zagueras acontezitas en la balle s’han afrontato con muta entrega e solidaridá bezinal, pero con mui pocos conoiximientos e menos medios. Que no ayamos sufierto daños personals (encara que sí materials) ye estato només cuestión de suerte.

06. PNOMP, acampata
Ba estando ora de normalizar las relazions con la entidá chestora d’el Parque. Emos perdito mui buenas ocasions pa replegar importans aduyas economicas que han rematato en altros munizipios de la redolata, per las malas relazions entre el nuestro conzello e la entidá chestora d’el Parque.

Abría a regularizar-se, ademés, l’acampata d’el fondo de la Balle Pineta, la situazión de güe supone un lastre se queremos apostar per un turismo de calidá.

07. Regulazión d’el trafico
¿Cómo ye posible que en un lugar de menos de 300 abitans se i sufran entrascatas berano zaga berano? Las timidas prebas d’ordenar el trafico han resultato estar més que insufiziens.

08. Ganadería
Refirme a’l seutor ganader, tradizional en estas balles, con medidas espezificas: siñalizazión de carreteras (cabañeras e zonas pastorals), instalazión de pasos canadienses, …

09. Iluminazión Espierba e Parzán
La iluminazión d’estas aldeas no ye pro en cuantas zonas, no n’i hai mica en altras, e con carenzia de mantenimiento en la mayoría.

10. Millorar l’aczeso ta Espierba
L’aczeso ta Es Morés d’Espierba se i troba en un estato lamentable, impropio d’una aldea que cuenta con poblazión tot l’año.

11. Nuebas teunolochías
Podemos considerar-nos pribilechiatos per contar con un serbizio de banda ampla (ADSL) en la balle, pero abrinos a conseguir que fues aczesible pa totas las casas, cosa que no pasa güe.

12. Alternatibas d’ozio e cultura
Acondizionamiento d’el edifizio de las piszinas, e aprofitamiento pa espazio d’autibidaz culturals, ludoteca e altras autibidaz.

Recuperazión de las proyeczions semanals en el salón de la Casa la Billa, autibidá que ya se fayó mientres un tiempo con pro esito de publico.

Atenzión espezial a las manifestazions culturals tradizionals de la Balle (Mosicas, bailes, fiestas, etc.) e en espezial refirme dezisibo a’l belsetán pa la suya recuperazión, dignificazión e uso.

13. Refirme nuebas iniziatibas
Inzentibo e refirme d’iniziatibas particulars u empresarials que permitan la creyazión d’empleo.